Jessica Webster: ’n Perd sonder ’n naam

Die solo-uitstalling deur die feeskunstenaar, Jessica Webster, verteenwoordig ’n poging deur die kunstenaar om die basiese grondslae van haar praktyk uit te daag. Die reeks skilderye, oor verskeie jare saamgestel, fokus op die gebruik van jute-stof (goiing) en ’n koue was-substraat, wat die tradisionele katoendoek en olieverf vervang. Hierdie vernuwende benadering skep ’n ruimte vir kreatiewe uitdrukking en moedig feesgangers aan om dieper te delf as net die oppervlakkige estetiese, en dit wat as “mooi” gekenmerk word. Webster beskryf die motivering hiervoor as ’n begeerte om kontemporêre skilderkuns uit te daag. Sy stel die skilderye voor as “anti-esteties”. Dit sluit landskapfoto’s, argieffoto’s, pop-grafika, neo-klassieke skilderkuns en selfs speletjies soos Candy Crush in. Die landskap bly die kern- onderwerp in die uitstalling, maar in hierdie werk word die ontwrigting van die simboliese landskap ’n daad van palimpses en skade.