Kyk noord en fees voort 🥳 KLOP KLETS, Oktober 2024

Dagsê ’klopper!

In die onsterflike woorde van The A-Team se Hannibal: “I love it when a plan comes together.” En vanjaar het die planne weer seepglad bymekaar gekom vir ’n Aardklop-fees wat geloop het soos stroop.
Soos een geesdriftige feesganger gesê het: “Julle is die beste in die land. Ek was nou al by baie feeste, maar hiérdie fees – alles is net die beste wat jy kan kry.” (Ons het haar nie eens betaal om dit te sê nie. Belowe.)
Van die venues en die feesterrein tot die pendeldiens en selfs die openbare toilette – alles was nét reg. Skoon, netjies, gerieflik, en lékker, man, lekker. Daar is fees gevier dat die biesies bewe, van vroeg tot laat, in ’n verskeidenheid van genres en kunsvorme.
Die feestelikhede is oudergewoonte afgesluit met ’n langtafel-kuier, waar daar met spys en drank op die week se dinge teruggekyk kon word.

Die (byna) laaste sê

Die diversiteit van die programinhoud en balans was ’n doelbewuste besluit van die feesorganiseerders.
Soos Alexa Strachan, Aardklop se uitvoerende hoof, sê:
“Aardklop het ’n duidelike vars stem, en hierdie stem dra by tot allerbelangrike gesprekke oor kwessies in ons lieflik kleurvolle, maar ook kwesbare en hartseer samelewing.
“Ons dink en debatteer oor die gemarginaliseerdes, die oorgeslaandes. Ons maak stem dik en pleit dat ons ophou wegkyk en wegdeins van omgemaklike dinge en kwessies.
“Saam vier ons fees, en raak ons deel van ’n kollektiewe gees en ervaring. Mure val en grense verdwyn.
“Vir kosbare oomblikke is ons een.”

‘And the Oscar goes to . . .’

Hulle is die rede hoekom ’n fees bestaan. Daarom gee Aardklop jaarliks erkenning aan uitnemendheid in die kunste.

Hiermee dan veels geluk aan vanjaar se benoemdes vir die Aardklop-toekennings, waarvan die wenners op 1 November bekend gemaak word:

BESTE BYSPELER
David Viviers – Op die hoek van Styx en River is Nora per abuis met die dood oorgeslaan
Jacques Adriaanse – Forte
Joshwin Dyson – Ken jy vir Dewie?
Ludwig Binge – Veelhoek

BESTE AKTRISE
Antoinette Kellermann – Die stoele
Crystal-Donna Roberts – Ken jy vir Dewie?
Jana Cilliers – Veelhoek
Margit Meyer-Rödenbeck – Ouma is op pad
Rika Sennett – Forte

BESTE AKTEUR
Chris van Niekerk – Die stoele
David Viviers – Die lewe in ‘n dag van ‘n vrugtevlieg
Frank Opperman – Stinkhout
Joshwin Dyson – Laaitie mettie biscuits
Wessel Pretorius – Die lewe in ‘n dag van ‘n vrugtevlieg

BESTE REGISSEUR
Philip Rademeyer – Stinkhout
Margit Meyer-Rödenbeck – Ken jy vir Dewie?
Marthinus Basson – Die stoele

BESTE MUSIEKUITVOERING
Die Charl du Plessis Trio – vir Vivaldi Vier Seisoene
Elvis Blue – vir Elvis Blue: Dis wie ek wil wees
Elzabé Zietsman – vir Vier Panado’s en ’n chardonnay
Eldon van der Merwe – vir Deon Meyer en Coenie de Villiers se Roem: ’n Musiekverhaal

BESTE MUSIEKGEDREWE PRODUKSIE
André Schwartz: Gesigte
Mass for the Good Princes
Vier Panado’s en ’n chardonnay

BESTE TONEEL-PRODUKSIE
Die lewe in ’n dag van ’n vrugtevlieg
Die stoele
Ken jy vir Dewie?
Reünie
Stinkhout

TOEKENNING VIR GRENSVERSKUIWENDE WERK
(slegs debuutwerk)
Stinkhout
Mass for the Good Princes

BESTE NUUTGESKREWE AFRIKAANSE TEKS
Magda Louw: ’n Les in kletterkunde – teks: Desiré Gardner
Marion Monroe – teks: Marion Holm en Chris Vorster
Stinkhout – teks: Philip Rademeyer

BESTE UITSTALLING
Cumulonimbus – Colette Lotz
Ek sien jou / Sawubona / I see you – kurator: Rory du Plessis
Silo – kurator: M.C. Roodt

Die benoemings vir Beste Algehele Aanbieding en Hartsvriende Beste Produksie word later bekend gemaak.

Geld kán sekere soorte geluk koop

Kom ons sê nou maar ’n ding soos hy is. Hoewel die direksie en feesorganiseerders hoogs tevrede is met vanjaar se kaartjieverkope en bywoning, is die eenvoudige waarheid: sonder borge en medewerkers, is ’n fees van dié omvang onmoontlik.
Dus, innige dank aan: Momentum Beleggings, Netwerk24, die NWU, die ATKV, kykNET, Suzuki Auto SA, SAB AbInBev (as Castle), Eskort, Heineken Beverages (as Klipdrift), NATi, AK21, die LW Hiemstra Trust en die Dagbreek Trust.

Terloops . . .

Nou ja, September 2024 het gekom en gegaan, en nou sien die meeste van ons uit na ’n welverdiende ruskans hier na die einde van die jaar se kant toe. Maar daar word reeds gepraat en gebroei aan volgende jaar se fees. Wanneer ons hoop om jou weer net die beste te gee wat ons het.
Maak dus solank ’n nota in jou dagboek vir 7-12 Oktober 2025. Jippie!

#aardklop2025 #hierkomons