Hallusinasies van die Vaal

’n Besinning oor ervarings wat nie eerstehands beleef is nie, maar deur ander se dokumentasie betree word. Gefragmenteerde aanlyn beelde wat temas van onderdompeling, eensaamheid en landskap suggereer, dien as vertrekpunt. Die werke is drie keer bemiddel – deur iemand anders se ervaring, die visuele vaslegging daarvan, en uiteindelik die herinterpretasie op papier. 

Die praktyk ondersoek die afstand tussen oppervlak en onderliggende emosionele resonansies. Die bergagtige landskappe verwys na ’n verbeelde ruimte – landvorme as simbole van verlange, introspeksie en volharding. Die werke probeer nie ervarings herskep nie, maar eerder ’n dialoog aanwakker rondom die idee van “wat onder lê”. 

Deur ’n merk, gebaar en spoor word onderstrominge van begeerte, herinnering en afwesigheid gesuggereer – intuïtiewe en affektiewe lae wat aanvoelbaar bly. Die tekeninge nooi die kyker om verby die oppervlak te kyk en dieper, psigologiese landskappe te verken wat steeds in die kollektiewe bewussyn voortleef. 

Met: Rhett Martyn