Hoe lyk’it, ’klopper?

Die gordyne het gesak, die feesstof het gaan lê en die laaste applous het lankal weggesterf. Maar moenie dink ons is klaar met die kunste nie!

Want ná al die drama, die musiek, die lag, die trane en daardie oomblikke wat ’n mens sommer weer hoendervleis gee, is dit tyd om ’n welverdiende klop op die skouer uit te deel.

En glo ons, dis makliker gesê as gedaan! Met só ’n uiteenlopende feesprogram en soveel uitsonderlike talent het ons beoordelaarspaneel behoorlik kopgekrap om vanjaar se uitblinkers uit te sonder.

Vanjaar doen ons dinge so ’n bietjie anders. Ons verruil die rooi tapyt vir die digitale verhoog en maak die wenners van die Momentum Aardklop 2026-toekennings oor die volgende paar dae aanlyn bekend. Sommer hier én op ons sosialemediablaaie.

Natuurlik is wen nie alles nie. Die kunste laat hulle immers nie so maklik in boksies druk nie. Maar dit bly lekker om erkenning te gee aan die kunstenaars wat ons laat dink, voel, lag en soms selfs ’n traan laat pik.

Hou dus hierdie blad dop soos ons die wenners een vir een bekendmaak.

Die gordyn het geval, maar die applous leef voort – soos’it moet wees!